மன்னார் மனிதப் புதைகுழி - சர்வதேச விசாரணையைக் கோரும் மன்னார் மாவட்ட மக்கள்

மன்னார் திருக்கேதீஸ்வரத்தில் கண்டுபிடிக்கப்பட்டுள்ள மனிதப் புதைகுழி தொடர்பில் ஐக்கிய நாடுகள் சபை முழுமையான விசாரணை நடத்த வேண்டுமென்று மன்னார் மாவட்ட மக்கள் அவசர வேண்டுகோள் விடுத்துள்ளனர். இந்த விசாரணையில் சிறிலங்கா காவல்துறையிரோ சிறிலங்கா படையினரோ சம்பந்தப்படக்கூடாது என்றும் அவர்கள் தெரிவித்துள்ளனர். சிறிலங்கா அரசாங்கத்தின் அனுமதிக்காக காத்திருக்காமல் இந்த நடவடிக்கையில் ஐக்கிய நாடுகள் சபை ஈடுபட வேண்டும். ஐ.நா வன்னியில் நடைபெற்ற மனிதப் பேரழிவைத் தடுக்க முடியாத கையறுநிலையில் இருந்த பாவத்தைக் கழுவ வேண்டுமென்றால் இந்தப் புதைகுழி தொடர்பில் உரிய விசாரணை மேற்கொண்டு தமிழ் மக்களுக்கு நீதி வழங்க வேண்டும் என்றும் மன்னார் மக்கள் கோரியிருக்கின்றனர். காலத்தை இழுத்தடிக்காமல் உடனடியாக விசாரணை தொடங்கப்பட வேண்டும் என்றும் அவர்கள் வலியுறுத்தியுள்ளனர். மன்னார் திருக்கேதீஸ்வரம் பகுதியில் உள்ள மனிதப் புதைகுழி தொடர்பாக தகவல் அறிவதற்காக கடந்த சனிக்கிழமை மன்னாருக்குச் சென்று திரும்பிய சங்கதி24 இன் கொழும்புச் செய்தியாளரூடாகவே மன்னார் மக்கள் இந்த அவசர கோரிக்கையை விடுத்துள்ளனர். எமது கொழும்புச் செய்தியாளர் கா.இனியவன் மன்னாரின் பல இடங்களுக்கும் சென்று பல்வேறு தரப்பினருடனும் கலந்துரையாடியுள்ளார்.